Сомонаи расмии Вазорати маориф ва илми Тоҷикистон пас аз тахрибкорӣ аз ҷониби ифротгароён барқарор карда шуд.

Эҳсон Хушвахт, сухангӯи Вазорати маориф ва илми Тоҷикистон ба «Азия-Плюс» дар ин робита иттилоъ дод, ки фаъолияти сомонаи www.maorif.tj бо кумак ва дар ҳамкорӣ бо ширкати мобилии «Вавилон» дубора барқарор ва ба акнун ба таври маъмулӣ фаъолият мекунад. Дар бораи тафсилоти ин қазия Вазорат баъдтар маълумот хоҳад дод.

Ёдрас мекунем, ки субҳи 14 январ гурӯҳи исломгароёнаи тахрибкорони сомонаҳо (хакерҳо)-и «Tunusian Fallaga-Team» сомонаи расмии Вазорати маориф ва илми Тоҷикистонро тахриб намуданд . Онҳо бо даъват аз Русия ҷиҳати хотима бахшидан ба дастгирии президенти Сурия Башор Асад дар он маълумот интишор карда буданд.

Зимни кушодани сомона бо суроғаи www.maorif.tj аз номи «Tunusian Fallaga-Team» ба унвони Русия ва кишварҳои ҷонибдори «сохти ҷиноятпешаи Башар» маълумот пайдо мешуд. Тахрибкорон ҳамчунин аз низомиёни рус даъват карда буданд, ки ба «хароб намудани оилаву манзилҳо, мактабу бемористон» ва «қатли мусалмонон дар Сурия ва Чечченистон» хотима бахшанд.