Раиси Кумитаи ҳолатҳои фавқулода ва мудофиаи гражданӣ (КҲФ ва МГ)-и назди ҳукумати ҶТ генерал-лейтенант Рустам Назарзода бо сафири ИМА дар Тоҷикистон Элизабет И.Миллард диору гуфтушщшунид карда, зимни вохӯрӣ масоили таҳкими минбаъдаи рушди робитаҳои дуҷониба дар самти коҳиши хатарҳои офатҳои табиӣ мавриди баррасӣ қарор гирифтанд.

Бино ба иттилои маркази матбуоти Кумита, Рустам Назарзода ба сафири ИМА доир ба тадбирҳои ҳукумати ҷумҳурӣ баҳри рафъи оқибатҳои табиӣ дар Тоҷикистон, ки соли 2015 рух дода буданд, маълумот дод.

Дар навбати худ сафири ИМА изҳор дошт, ки Вашингтон Тоҷикистонро дар масоили коҳиши хатарҳои офатҳои табиӣ ва ҳамчунин таҳкими имконоти ин ниҳод ҳамеша дастгирӣ хоҳад кард.

Рустам Назарзода ҳамчунин бо муваққатан иҷрокунандаи вазифаи сафири Шоҳигарии Арабистони Саудӣ дар Тоҷикистон Ҳамза Ал-Ҳарбӣ низ вохӯрда, дар ҷараёни мулоқот масъалаҳои коҳиши хатарҳои офтаи табиӣ ва фалокатҳои техногенӣ баррасӣ шуданд.

Зимни вохӯрӣ ҳамчунин атрофи масоили роҳандозии ҳамкорӣ дар доираи як қатор барномаҳо ва фондҳои Арабистони Саудӣ, ки ба ҳалли ин мушкилот машғуланд, табодули назари судманд сурат гирифт.