Дар амали террористие, ки нимаи дуюми рӯзи якшанбе дар пойтахти Туркия - шаҳри Анқара содир шуд, 34 нафар ба ҳалокат расиданд.

Хабаргузории Reuters бо истинод ба вазири тандурустии Туркия Мехмет Муаазиноғлу дар ин робита иттилоъ медиҳад, ки айни замон 125 нафари аз ин амал осебдида дар бемористонҳо бистарӣ буда, вазъи 19 тан аз онҳо хеле вазнин аст.

Ҳамчунин хабар дода мешавад, ки ҳадди ақал 1 ё 2 нафари ҳалокшудагон бар асари таркиш худи террористони амалро содиркарда мебошанд.

Вазири корҳои дохилии Туркия Эфкан Ала изҳор доштааст, ки сабаби таркиш автомобили минагузоршуда аст ва имрӯз тафтишоти ин амали террористӣ ба анҷом расида, аз натиҷаҳои он хабар дода мешавад.

Тибқи маълумоти пешакӣ, ин ҳодисаи фоҷеабор дар шафати боғи Гювен, каме дуртар аз нуқтаи бузурги баҳамоии нақлиёти шаҳри Анқара ба вуқӯъ пайваста, террористи маргталаб автомобили минагузоришударо дар паҳлӯи истгоҳи автобусҳо мавриди инфиҷор қарор додааст.

Ба гуфтаи намояндаи сохторҳои қудратии Туркия, алҳол ҳеҷ кадоме аз созмонҳои террористӣ масъулияти ин амалро ба дӯш нагирифтаанд.