Вазорати мудофиаи Иёлоти Муттаҳидаи Амрико кумакҳои низомӣ ба дигар кишварҳоро афзун карданист.

Нашрияи Politico дар ин робита менависад , миёни кишварҳое, ки аз ин лиҳоз дастгирӣ меёбанд, Тоҷикистон низ ҷой дорад, ки ба андешаи Вазорати мудофиаи ин кишвар, дар он ҷо мавридҳои шиканҷаву таъқиб ба таври густурда истифода мешавад.

«Миёни кишварҳое, ки Пентагон ба онҳо хоҳони кумак аст, Буркина-Фасо, ки дар он тибқи изҳороти Департаменти давлатӣ ҳуқуқҳои занонро поймол мекунанду нисбати маҳкумшудагон аз қувваи беҳад зиёд кор мегиранд ва ҳамчунин Тоҷикистон, ки ба андешаи ин мақомот, дар он аз шиканҷа ва «таъқиб нисбати фаъолони сиёсӣ» васеъ истифода мешавад, ҷой доранд», - қайд мешавад дар маводи нашрия.

Гуфта мешавад, соли гузашта Вазорати мудофиаи ИМА барои мусаллаҳ гардонидан ва омӯзиши низомиёни маҳаллӣ дар Амрикои Лотинӣ, Аврупои Шарқӣ, Осиёи Ҷанубу Шарқӣ ва Шарқи Наздик дар маҷмӯъ 11 млрд. доллари ИМА масраф кардааст.

Мутобиқи ин барномаҳо, барои анҷом додани амалиёти зиддитеррористӣ ва тақвияти ҳимояти марзҳо ба ин кишварҳо аслиҳаву таҷҳизот фиристода мешавад.