- Мақомоти интизомии Русия рӯзи 30 март дар шаҳри Маскав як гурӯҳи иборат қариб аз 20 нафар ҷонибдорони созмони террористии ба ном Давлати исломиро дастгир карданд, - иттилоъ медиҳад РИА Новости бо истинод ба манобеи худ дар мақомоти ҳифзи ҳуқуқ.

«Дар ҷараёни амалиёти муштараки кормандони Хадамоти федералии амният ва мақомоти пулис дар Маскав ҳудуди 20 тан аз гумонбарон ба робита доштан бо Давлати исломӣ боздошт шуда, тибқи маълумоти пешакӣ, онҳо ба ҷустуҷӯ ва ба сафҳои созмон ҷалб кардани аъзои нав машғул буданд», - гуфтааст мусоҳиби хабаргузорӣ, вале ниҳодҳои интизомии зикршуда алҳол ин маълумотро шарҳ надодаанд.

Аммо, хабар медиҳад « Интерфакс »  бо такя ба манобеи худ дар сохторҳои қудратӣ, ин 20 нафар ҳамкорону ҷонибдорони боздоштшудаи Давлати исломӣ дар пойтахти Русия аз Туркия ба Маскав омадаанд.

Гуфта мешаванд, айни замон алоқамандӣ доштани афроди боздоштшуда ба созмонҳои террористӣ ва эҳтимоли даст доштани онҳо дар фаъолияти ин гурӯҳҳо мавриди таҳқиқ қарор дода шудааст.