Кормандони ВКД Тоҷикистон ба гумони даст доштан дар омодакунии таркиши бинои Раёсати милитсияи вилояти Хатлон ду тан аз сокинони ноҳияи Ҷиликӯл - Шамсидин Фатҳиддинови 30-сола ва Самовиддин Саймуҳиддинови 28-соларо боздошт намуданд. Шабакаи давлатии телевизиони «Сафина» шоми рӯзи 31 март гузориши таҳиянамудаи кормандони ВКД-и кишварро дар ин хусус намоиш дод.

Дар гузориши қайд шуд, ки ҳарду боздоштшуда қаблан аз Русия ба Ироқ рафта, он ҷо дар сафҳои созмони террористии ба ном Давлати исломӣ (ДИ) меҷангидаанд.

Яке аз боздоштшудагон - Ш.Фатҳиддинов назди видеокамера мегӯяд, ӯ дар шаҳри Мосул сари чамбараки автомашинаи мингузоришуда нишаста, омода буд, ки худро қурбон намояд. «Вале маро аз ин амал Самовиддин боздошт», - қайд кард ӯ.

Бино ба маълуомти ВКД, боздоштшудагон чанде қабл аз Ироқ ба Туркия баргашта, сипас ба Русия ва аз он ҷо ба Тоҷикистон омадаанд.

Боздоштшудагон баёнот доданд, ки бо супориши Давлати исломӣ ният доштаанд, ки дар автомашинаи бо баллонҳои газ боршуда бинои Раёсати ВКД дар Хатлонро рахна созанд. «Дар Давлати исломӣ ваъда доданд, ки ба ивази бинои тарконидашуда ба мо арзиши даҳ автомашинаро пардохт мекунанд», - изҳор доштанд онҳо.