Мансабдорони Русия тасмим гирифтаанд, ки сарфи назар аз сатҳи хатари террористӣ, тамоми фурудгоҳҳои кишварро ба бозрасии ҳамаҷониба (тоталӣ)-и мусофирон уҳдадор созанд.

Хабаргузории Газета. ру. дар ин робита менависад, айни замон бозрасии мусофирон бар асоси ҷорӣ шудани сатҳи баланди бехатарӣ дар соли 2011 гузаронида шуда, аммо дар сурати паст шудани сатҳи он ҳам, хадамоти дахлдор ба азназаргузаронии ҳамаи бошандагони фурудгоҳ идома медиҳанд.

Гуфта мешавад, Вазорати нақлиёти Русия тағйирот ба Кодекси фазои ҳавоиро таҳия намудааст, ки мутобиқи он фурудгоҳҳо ба бозрасии мукаммали мусофирон ва бағочи онҳо зимни воридшавӣ ба фурудгоҳ вазифадор карда мешаванд.

Дар Вазорати нақлиёти ин кишвар таҳия шудани чунин тағйиротро тасдиқ намуда, таъкид доштаанд, ки «дар сурати аз ҷониби шахс рад шудани бозрасӣ дар даромадгоҳи фурудгоҳ, вуруд ба бинои фурудгоҳ барои ӯ иҷозат дода намешавад».