Рӯзҳои 15-16 апрели соли равон дар шаҳри Гулистони (собиқ Қайроққум) вилояти Суғд нахустин ҷаласаи мушовараи якҷояи Вазоратҳои корҳои дохилии Ҷумҳурии Тоҷикистон ва Ҷумҳурии Қирғизистон доир мегардад.

Бино ба иттилои маркази матбуоти ВКД ҶТ, ин ҷаласа тибқи Фармоиши муштараки Вазоратҳои корҳои дохилии Тоҷикистон ва Қирғизистон аз 3-юми июни соли 2015 баргузор мешавад.

Зимни ҷаласа баррасии масоили таҳкими ҳамкориҳо миёни мақомоти корҳои дохилии ҳарду кишвар, муборизаи муштарак бо терроризму ифротгароӣ, ҷинояткории муташаккилона ва табодули таҷриба дар самти ислоҳоти милитсия дар назар аст.

Қобили зикр аст, ки ҳайати кишвари ҳамсоя таҳти сарварии вазири корҳои дохилии Қирғизистон Мелис Турганбаев аллакай ба шаҳри Гулистон ташриф оварда, дар ин ҷо мулоқоти вазирони корҳои дохилии ҳарду кишвар Мелис Турганбаев ва Рамазон Раҳимзода баргузор шуд ва вазири корҳои дохилии Тоҷикистон изҳори боварӣ намуд, ки равобит ва муносибатҳои дуҷонибаи ниҳодҳои қудратии ҳарду давлат боз ҳам равнақу густариш хоҳанд ёфт.

Дар навбати худ Мелис Турганбаев изҳор дошт, ки итминони комил дорем, ҳамкориҳои судманд ва рушди муносибатҳои дӯстонаи ду давлати ҳамсоя баъди баргузории Мушовараи якҷоя боз ҳам тақвият меёбанд.