Нахуствазири Туркия Биналӣ Йилдирим изҳор доштааст, ки се террористи маргталаб худро дар терминали байнулмилалии фурудгоҳи шаҳри Истанбул тарконида, бар асари он 36 нафар ба ҳалокат расидаанд.

Биналӣ Йилдирим бар ин назар аст, ки содир шудани амали террористӣ дар фурудгоҳи ба номи Отатурк дар шаҳри Истанбул кори дастаи «Давлати исломӣ» аст. Ӯ аз 36 нафар қурбонии ин амали террористӣ ва 147 нафар захмишудагон иттилоъ додааст. Ба қавли нахуствазири Туркия, террористон аввал аз силоҳ оташ кушода, сипас худро тарконидаанд.

Ғайр аз ин, CNN бо истинод ба мансабдорони амрикоӣ дар ин робита иттилоъ медиҳад, ки ҳамла ба фурудгоҳ дорои аломатҳои махсусе мебошад, ки аз он Давлати исломӣ истифода мекунад.

Қобили зикр аст, ки шоми рӯзи сешанбе дар қисматҳои пешвози хатсайрҳои байнулмилалӣ ва дохилии фурудгоҳи ба номи Отатурк дар шаҳри Истанбул ду таркиш ба вуқӯъ пайваст.