Вазорати корҳои хориҷии ҷумҳурӣ изҳор намуд, ки миёни осебдидагон дар амалҳои террористӣ дар фурудгоҳи ба номи Отатурки шаҳри Истанбули Туркия шаҳрвандони Тоҷикистон ҳузур надоранд.


Дар департаменти иттилооти ВКХ Тоҷикистон дар ин робита қайд карданд, ки тибқи маълумоти саҳеҳи ахир, дар байни 47 нафар қурбониёну 147 захмишудагон дар таркишҳо шаҳрвандони ҷумҳурӣ ба қайд гирифта нашудаанд.

Ёдрас мекунем, ки шоми рӯзи сешанбе дар қисматҳои пешвози хатсайрҳои байнулмилалӣ ва дохилии фурудгоҳи ба номи Отатурк дар шаҳри Истанбул таркишҳо ба вуқӯъ пайваста , ба талафоти зиёди ҷонӣ боис шуданд.

Бино ба маълумоти ВАО, то субҳи имрӯз шумори кушташудагон аллакай 50 нафар ва захмишудагон ҳудуди 150 нафар арзёбӣ мешавад.

Корбарони шабакаҳои иҷтимоӣ дар саҳфаҳои худ зикр мекунанд, ки таркишҳо ба муносибати солгарди таъсиси созмони террористии Давлати исломӣ ба вуқӯъ пайвастаанд. Ду сол қабл, санаи 29 июни соли 2014 Давлати исломӣ таъсиси ба истилоҳ «халифат»-ро бо қонунҳо ва мақомоти мустақили ҳокимият эълон дошта буд.