Марзбонони тоҷик аз кӯшиши навбатии убури ғайриқонунии марз ва қочоқи маводи мухаддир ба ҷумҳурӣ ҷилавгирӣ намуданд.

Тавре сухангӯи Сарраёсати Қушӯнҳои сарҳадии КДАМ Тоҷикистон Муҳаммад Улуғхоҷаев иттилоъ дод, баъди нимашаби 9 август як гурӯҳи номаълуми иборат аз 4-5 нафар қочоқбарони мусаллаҳ дар дидбонгоҳҳои марзии «Шӯрообод»-и ноҳияи Шамсиддини Шоҳин сарҳадро гузаштанӣ шуда, ба марзбонон дучор мешаванд.

«Марзшиканон ба талаботи сарҳадбонон риоя накарда, миёни онҳо задухӯрди мусаллаҳона сурат мегирад, ки дар натиҷа бо истифода аз торикии шаб қочоқбарон дар қаламрави кишвари ҳамсоя паноҳ мебаранд», - гуфт манбаъ.

Зимнан зикр гардид, ки дар ҷойи ҳодиса 5 кило маводи мухаддири сахттаъсири героин, силоҳи оташфишон бо тирҳояш дарёфт шуда, айни замон мақомоти марбута ба таҳқиқи ин ҳодиса машғул аст.