«Гузаргоҳҳо дар марз бо Афғонистон баста нестанд ва сарҳадбонон бо реҷаи муқаррарӣ марзро посбонӣ мекунанд», - хабар дод ба «Азия-Плюс» Муҳаммад Улуғхоҷаев, котиби матбуотии Сарраёсати Қушӯнҳои сарҳадии КДАМ Тоҷикистон.

Ба қавли ӯ, «гузаргоҳҳои марзӣ дар сарҳад бо Афғонистонро касе набаста, ҳама мисли пешин аст ва ҳамчунин пулҳо низ тариқи дарёи Панҷ баста нашудаанд, ки дар бора чанде аз ВАО хабар доданд».

Дар ҳамин ҳол Радиои Озодӣ дар ин робита хабар дод, ки Тоҷикистон панҷ пул (купрӯк) ва як гузаргоҳ бо Афғонистонро баста, фаъолияти панҷ бозори марзӣ дар ҳудуди вилояти Бадахшону ноҳияи Шамсиддин Шоҳини вилояти Хатлонро қатъ кардааст.

Ду ҳамсӯҳбати Радиои Озодӣ дар мақомоти вилояти Хатлон гуфтаанд, ки “пулу гузаргоҳҳои марзӣ бо далелҳои амниятӣ муваққатан баста шуд”.

Аҳмад Файсал Бекзод, волии вилояти Бадахшони Афғонистон, дар сӯҳбат ба Радиои Озодӣ гуфтааст, талош доранд, то ҷониби Тоҷикистонро итминони хотир бидиҳанд, ки марзро боз намояд.

“Фаъол будани пулҳо, фаъол будани бозорҳо бисёр муҳиму ҳаётӣ барои мост. Мо роҳи хуб бо марказ надорем. Бахусус дар ин шабу рӯз ва барфбориҳо роҳ ба марказ мушкилгузар аст. Аз ин рӯ, тамоми маводи ғизоӣ аз самти Тоҷикистон ворид мешавад”, - илова кардааст ӯ.