Вазорати корҳои дохилии Тоҷикистон баъзе васоити ахбори умумро ба нашри маълумотибардурӯғ ва иғвобарангез айбдор мекунад.

Дар раддияи нашршуда дар сомонаи ин ниҳод дар ин рбита қайд мешавад, ки 10 марти соли 2018 дар сомонаи иттилоотии «АХБОР КОМ» таҳти унвони «Нархро арзон накунед! Муноқишаи байни тоҷирони тоҷику ӯзбек дар Конибодом» хабар ба чоп расид, ки гуё «Баъди кушода шудани марзи Ӯзбекистон тоҷирони ӯзбек бо маҳсулоти арзон вориди бозорҳои Тоҷикистон шудаанд ва бино ба хабарҳо, аллакай байни онҳо ва тоҷирони маҳаллӣ аввалин муноқишаҳо бар сари нарх сар задаанд. Дар Конибодом барои арзон фурухтани молҳояшон чанд тоҷири ӯзбекро ҳатто задаанд… ».

Гуфта мешавад, ҷиҳати санҷиши асоснокии хабари дарҷгардида аз ҳисоби масъулини мақомоти корҳои дохилии вилояти Суғд бо шаҳрвандон ва тоҷирони шаҳри Конибодом ва дигар ноҳияҳои наздисарҳадӣ сӯҳбату вохӯриҳо гузаронида шуданд.

«Дар натиҷа маълум гашт, ки хабари мазкур бардурӯғ ва иғвобарангез буда, ба ҳақиқат наздикӣ надорад», - қайд мешавад дар раддияи вазорат.

Зимнан зикр мегардад, ки рафтуомади шаҳрвандони ноҳияҳои наздисарҳадии ду кишвари бо ҳам бародар дӯстона давом дошта, ягон ҳолати муноқишаи байни шаҳрвандон ва тоҷирони ду кишвар сари баландшавии нархи маҳсулот ҷой надорад.

Хабарҳои моро дар Telegram пайгирӣ намоед, ба шабакаи мо бо суроғаи  https://t.me/asiaplus  ҳамроҳ шавед.