Бо даъвати раиси Хадамоти амнияти давлатии Ӯзбекистон Ихтиёр Абдуллоев раиси Кумитаи давлатии амнияти миллии Тоҷикистон Саймумин Ятимов 16 апрел бо сафари корӣ ба шаҳри Тошканд рафт.

Бино ба иттилои АМИТ «Ховар», дар сарҳади давлатии Ҷумҳурии Тоҷикистон бо Ҷумҳурии Ӯзбекистон дар минтақаи нуқтаи гузаргоҳӣ-назоратии «Фотеҳобод» С. Ятимов ва ҳайати ҳамроҳонашро раиси ХАД ҶӮ И. Абдуллоев пешвоз гирифт.

Гуфта мешавад, зимни музокирот роҳбарони хадамоти махсуси ду давлати бародар оид ба доираи васеи масъалаҳои ҳамкории дуҷониба ва бисёрҷониба, инчунин мушкилоти амнияти минтақавӣ табодули афкор намуданд.

Тадбирҳои муштарак барои мубориза бо чолишу таҳдидҳои муосир, терроризму ифротгароӣ, аз ҷумла пешгирии фаъолиятҳои ҷинояткоронаи созмонҳо ва ҳаракатҳои террористиву ифротгаро муҳокима шуданд.

Ҷонибҳо доир ба ҳамоҳангсозии амалҳо ва татбиқи чораҳои дар ин самт мувофиқашуда ба созиш расиданд.