Хизматчиёни ҳарбии Отряди сарҳадии “Ҳамадонӣ”-и Қӯшунҳои сарҳадии КДАМ ҶТ дар якҷоягӣ бо кормандони КДАМ ҶТ дар вилояти Хатлон рӯзи 16 апрел аз кӯшиши навбатии интиқоли маводи нашъаовар аз Афғонистон ба Тоҷикистон пешгирӣ намуданд.

Тавре сардори маркази матбуоти Қӯшунҳои сарҳадии КДАМ ҶТ Муҳаммад Улуғхоҷаев хабар дод, қочоқчиёни афғон бо хизматчиёни ҳарбӣ рӯ ба рӯ ва борхалтаро дар назди иншоотҳои сарҳадӣ партофта, ба самти Афғонистон фирор намудаанд.

Гуфта мешавад, ҳангоми азназаргузаронии ҷои ҳодиса тақрибан 20 кг маводи мухаддири навъи бангдона дарёфт ва мусодира шудааст.

Ҳамчунин қайд шуд, ки ҳангоми гузаронидани корҳои кофтуковӣ ва поксозии марзи давлатӣ дар минтақаи Отряди сарҳадии Шӯрообод, дар наздикии иншооти хати марзи давлатӣ махфиҳгоҳи махсус пайдо карда шуд, ки ҳангоми азназаргузаронӣ аз дохили он маводи нашъадори сахтаъсири героин тақрибан 5 кг дарёфт ва мусодира карда шуд.

Зимнан зикр мегардад, ки аз рӯи ин далелҳо тафтишот идома дорад.