Сардори Ситоди кулли Қувваҳои мусаллаҳи Тоҷикистон, муовини аввали вазири мудофиаи ҷумҳурӣ генерал-лейтенант Эмомалӣ Собирзода нимаи ҳафтаи оянда ба Маскав меравад.

Ӯ дар ҷаласаи навбатии Кумитаи ҳарбии Созмони Аҳдномаи амнияти дастаҷамъӣ (СААД), ки 14 апрел таҳти раёсати сардори Ситоди кулли ҚМ Русия, муовини аввали вазири мудофиаи ин кишвар генерали артиш Валерий Герасимов доир мегардад, иштирок мекунад, хабар дод ба “Азия-Плюс” як манбаъ аз Вазорати мудофиаи Тоҷикистон.

Дар кори ҷаласа инчунин иштирок сардорони Ситоди кулли Қувваҳои мусаллаҳи Арманистону Беларус ва Қазоқистону Қирғизистон пешбинӣ шудааст.

Дар назар аст, ки Эмомалӣ Собирзода ба аъзои Кумитаи ҳарбӣ дар бораи самтҳои афзалиятноки фаъолияти низомии СААД маълумот диҳад, ки дар давраи раёсати Тоҷикистон дар Созмон дар соли 2021 пешниҳод мешаванд.

Дар ҷаласа баррасии таҳдиду чолишҳо ба амнияти ҳарбӣ дар минтақаҳои Аврупои Шарқӣ, Қафқоз ва Осиёи Марказӣ, чорабиниҳои омодагии муштараки мақомоти идоракунӣ ва ташкили неруву воситаҳои низоми амнияти дастаҷамъии СААД, фаъолияти маркази вокуниш ба буҳрони Созмон ва таъсиси воҳиди муштараки ҳифзи радиатсионӣ, кимиёвӣ ва биологӣ, инчунин таъминот бо хизматрасонии тиббӣ ба нақша гирифта шудааст.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.