Имрӯз, 17-уми октябр, Амир Муҳаммадризо Оштиёнӣ, вазири дифоъ ва ҳимояти нерӯҳои мусаллаҳи Ҷумҳурии Исломии Эрон ба Тоҷикистон меояд. Дар ин бора хабаргузории нимарасмии Эрон “Тасним” иттилоъ медиҳад.

Ба гузориши ин хабаргузорӣ Муҳаммадризо Оштиёнӣ, дар раъси як ҳайъати баландпоя вориди Душанбе хоҳад шуд.

Гуфта мешавад, ӯ бо Эмомалӣ Раҳмон, Президенти Тоҷикистон ва вазири дифоъ Шералӣ Мирзо мулоқот мекунад.

“Баррасии масоили амниятӣ ва дифоии ду кишвар ва пайгирии қарордодҳои дифоии ду кишвар аз аҳдофи сафари Амир Оштиёнӣ ба Тоҷикистон аст”, - навиштааст манбаъ.

Ба гузориши хабаргузории “Тасним”, соли гузашта дар чаҳорчӯби ҳамкориҳои дифоии Эрон ва Тоҷикистон, дар Тоҷикистон хатти тавлиди ҳавопаймои бесарнишини эронии “Абобил-2” бо ҳузури сардори Ситоди кулли нерӯҳои мусаллаҳи Эрон Ҳусейн Боқирӣ ифтитоҳ шуд.

Ҷониби Тоҷикистон дар бораи сафари вазири дифои Эрон ба кишвар то ҳол ҳеҷ иттилое надодааст. Ҳамин тавр, Тоҷикистон ҳеҷ гоҳ ба таври расмӣ ифтитоҳи корхонаи тавлиди ҳавопаймои бесарнишини эронии “Абобил-2”-ро низ шарҳ надодааст.

Дар Telegram, Facebook, Instagram, OK ва ВК бо мо бимонед.