Бо таваҷҷуҳ ба таҳдиди хатар аз сӯи Толибон*, ки ҳоло дар Афғонистон ҳоким ҳастанд, Тоҷикистон садди аввал ва муҳимтарин монеаи ҳамлаҳои террористӣ ба кишварҳои узви СААД дониста мешавад ва аз ин рӯ, бояд марз он дар ҷануб боз ҳам мустаҳкам шавад.

Ин нуктаро Зоир Маҷидзода, доктори илмҳои ҳуқуқшиносӣ ва генерал-майори милитсия, имрӯз, 19-уми декабр, дар Конфронси байналмилалӣ таҳти номи “Нақши Созмони Аҳдномаи амнияти дастаҷамъӣ дар таъмини субот ва амният дар Осиёи Марказӣ” баён кард.

Ӯ гуфт, ҳоло Афғонистон манбаи чолишҳо ва таҳдидҳои навин шуда, ки ба амнияти кишварҳои Осиёи Марказӣ хатарнок аст. Дар ин кишвар таъсири ифротгароиву терроризм зиёд мешавад.

Зоир Маҷидзода афзуд, ки хавфи қочоқи маводи мухаддир, афзоиши теъдоди нашъамандон дар тамоми кишварҳои минтақа зиёд мешавад.

Бо таваҷҷуҳ ба ин хатарҳо, Зоир Маҷидзода зикр кард, ки Тоҷикистон садди аввал ва муҳимтарин монеаи ҷилавгирӣ аз ҳамлаҳои террористӣ ба кишварҳои узви СААД аст ва аз аъзоёни ин созмон хост, ки марзи Тоҷикистон бо Афғонистон боз ҳам мустаҳкам шавад.

Аз чап ба рост: Зоир Маҷидзода ва Шараф Ҳабибов, роҳбари Ташкилоти "Дӯстони Русия"
Asia-Plus

Гуфтан ба маврид аст, ки баъди ғасби қудрат дар Афғонистон аз сӯйи Толибон дар августи соли 2021 мақомоти Тоҷикистон пайваста аз афзоиши хатар дар марзи худ бо ин кишвар изҳори нигаронӣ мекунанд ва мегӯянд, дар қаламрави кишвари ҳамсоя гурӯҳҳои зиёди террористӣ таҷаммӯъ кардаанд.

Тоҷикистон баъди ба сари қудрат омадани Толибон дар Афғонистон ва афзоиши таҳдидҳо аз сӯи ин кишвар, назорати марзро пурзӯр кардааст. Аз ҷумла дидбонгоҳҳои сарҳадиро бештар кардааст. Ҳоло дар марзи Тоҷикистону Афғонистон беш аз 100 дидбонгоҳ ҳаст.

Ёдовар мешавем, ки пас аз ғасби қудрат дар Афғонистон аз сӯйи Толибон, роҳбарияти давлати Тоҷикистон мавқеи устувор ва оштинопазири худро алайҳи сиёсати ин гурӯҳ иброз намуда, зикр кард, ки ягона роҳи шинохти расмии онҳо ташкили ҳукумати ҳамашумул ва таъмини ҳуқуқи занон дар Афғонистон мебошад.

*Дар Тоҷикистон гурӯҳи террористӣ эътироф шудааст.

Ҳар он чи дар Афғонистон рух медиҳад, метавонед мустақиман дар сужаи мо - "Афғонистон" бихонед.

Дар Telegram, Facebook, Instagram, OK ва ВК бо мо бимонед.