Душанбе. 12 апрел. «Азия-Плюс» - | Мардони тоҷик аз додани талоқ ба ҳамсаронашон таввасути СМС хабар маҳрум мешаванд.

Раиси Кумитаи дини назди президенти кишвар Абдураҳим Холиқов андеша дорад, ки таввасути СМС - хабар талоқ додану аз ҳампошии оила амали ғайримантиқӣ, беақлона ва ноҷост, ки муқобили қавоини давлат ва шариат баромад мекунад.

Ба гуфтаи ӯ, бо пешниҳоди Кумита масъалаи мазкур дар Шӯрои уламои Тоҷикистон баррасӣ гашт.

«Оила муқаддас шуморида мешавад ва онро таввасути телефон хароб кардан мумкин нест,- мегӯяд Холиқов.- Ман боварӣ дорам, ки Шӯрои улламо, ки мақомоти волои мусалмонони кишвар маҳсуб мегардад, дар ин масъала қарори дурусте мебарорад».

Ба гуфтаи сарвари Донишкадаи Исломии Тоҷикистон Умаралӣ Назаров талоқ дар Шариат бадтарин ҳалол маҳсуб мегардад.

«Ман андеша дорам, ки зан-модар муқаддас аст ва эҳтироми хоссаро сазовор аст. Оилаҳо набояд вайрон шаванд, аммо агар воқеан дигар илоҷе набошад, мардон бояд бо назардошти қадру қиммати зан бо ӯ муносибат кунанд. Бояд ба таври лозима дар ҳузури зан қарори худро эълом кунанд», афзуд Умаралӣ Назаров.