Душанбе. 6-уми июн. «Азия-Плюс» — | Пас аз кишварро тарк гуфтани президенти Яман Алӣ Абдуллоҳ Солеҳ ба ин кишвар эҳтимоли ҷиддии сар задани ҷанги шаҳрвандӣ таҳдид дорад, - гуфт дар мусоҳиба ба хабарнигори ОИ «Азия-Плюс» директори Маркази тадқиқоти стратегии назди президенти Тоҷикистон Сӯҳроб Шарифов.

Ба қавли вай, то оғози гирдиҳамойиҳои оммавӣ дар ин кишвар дар моҳҳои феврал-марти соли ҷорӣ, президент Алӣ Абдуллоҳ Солеҳ ва дастаи ӯ бе ин ҳам бо як душворие аз ӯҳдаи идораи мамлакат мебаромаданд, зеро Яман мудом таҳти фишори пешвоёни қабилаҳои муқими он қарор дорад. «Ғайр аз ин, ахиран фишори ИМА ва кишварҳои узви Иттиҳоди Аврупо ба роҳбарони Яман афзуд, зеро ин кишвар пас аз Афғонистон маконе маҳсуб меёбад, ки террористони байнулмилалӣ дар он паноҳ бурдаанд», - гуфт ӯ.

Ба ақидаи Сӯҳроб Шарифов, пас аз кишварро тарк кардани президент мухолифат миёни пешвоёни кабилаҳо барои сари қудрат расидан тезутунд хоҳад шуд ва ин метавонад омилаи пурзӯри сар задани ҷанги шаҳрвандӣ гардад. «Бар асари беҳокимиятиву хараҷу мараҷ ва нооромӣ, ки метавонанд Ямаро фаро гиранд, ба он ҷо гурӯҳҳои террористии байнулмилалӣ роҳ пеш мегиранд, зеро нуқтаҳои даргир барои онҳо макони дилхоҳи будубоши осуда ва фаъолияти густарда аст», - афзуд номбурда.

Ёдрас мекунем, ки рӯзи ҷумъаи ҳафтаи гузашта президенти Яман Алӣ Абдуллоҳ Солеҳ бар асари мушакборони кохи Раёсати ҷумҳурӣ ҷароҳат бардошта, баҳри табобат ба Арабистони Саъудӣ мунтақил шуда буд. Баъди ба ҳуш омадан ӯ изҳор доштааст, ки ба ватан бармегардад, вале дар ин хусус то ҳанӯз маълумоти дақиқе дастрас нест.