Нишастҳои хабарии ҳар семоҳаи ҳатмии мақомоти давлатӣ дар Тоҷикистон бекор шуд. Мутобиқи супориши президенти мамлакат, шурӯъ аз 1-уми октябри соли ҷорӣ нишастҳои хабарии ҳатмии мақомоти давлатӣ дар ним сол як маротиба доир мегарданд.

Тавре ба ОИ «Азия-Плюс» аз Дастгҳи иҷроияи сарвари давлат хабар доданд, дар супориш гуфта мешавад, дар сурати зарурат роҳбарони вазорату идораҳо метавонанд дар як моҳ якчанд маротиба нишасти хабарӣ баргузор созанд.

Нуриддин Қаршибоев, раиси Анҷумани расонаҳои миллии мустақили Тоҷикистон дар робита ба ин масъала дар мусоҳиба ба хабарнигори ОИ «Азия-Плюс» изҳор кард, ки иқдоми мазкур вазъи бе ин ҳам душвори дастрасӣ ба маълумотро боз ҳам мушкилтар месозад.

«Ҳарчанд нишастҳои хабарии хар семоҳа ба ҳисоботи роҳбарон дар бораи фаъолияташон шабоҳат дошта буданд ҳам, ба ҳар ҳол, мебояд эътироф кард, ки онҳо воситаи асосии гирифтани маълумот аз сарчашмаи аслӣ ба шумор мерафтанд», - таъкид сохт ӯ.

Ба андешаи раиси Иттифоқи журналистони Тоҷикистон Акбаралӣ Сатторов, баргузории нишастҳои хабарии ҳар се моҳ аз иқдоми хубу назарраси сарвари давлат маҳсуб меёфт, ҳарчанд сатҳу сифати баргузории он на он қадр қобили қабул буд.

«Агар нишастҳои хабарии нимсолаи роҳбарони вазорату идораҳои давлатӣ дар сатҳи нисбатан баланд гузаронида шаванд ва дар онҳо вақти бештаре ҷудо гарданд, онҳо низ ба журналистон дар дастрасӣ ба маълумоти хушсифат мусоидат хоҳанд кард», - афзуд номбурда.