Соҳибкорони вилояти Свердловски Русия рӯзҳои 29-30-юми октябр ҷиҳати боздид аз минтақаи озоди иқтисодии «Суғд» ба Хуҷанд меоянд.

Тавре ба ОИ «Азия-Плюс» котиби матбуотии минтақаи озоди иқтисодии «Суғд» Хосият Комилова хабар дод, ба ҳайати Русия намояндагони корхонахои вилояти Свердловск дар ҶТ А. Осипов, ширкати холдинги «AES GROUP», ҶДММ «Остров», «Стройтехнология 2000» ва «Форатек» шомиланд.

Дар рӯзи аввали сафар вохӯрии расмии ҳайат бо мақомоти раҳбарии маъмурияти минтақаи озоди иқтисодии «Суғд» ва шиносоӣ бо субъектҳои минтақа ба нақша гирифта шудааст. Рӯзи дуюм дар маъмурияти минтақаи озоди иқтисодии «Суғд» масъалаҳои имконоти самтҳои имконпазири роҳандозии ҳамкорӣ, омодагирӣ ва имзои протоколҳо миёни намояндагони ширкатҳои русиягӣ ва маъмурияти минтақа баррасӣ мешаванд.

«Айни замон дар минтақаи озоди иқтисодии «Суғд» 16 субъект ба қайд гирифта шудааст, ки корхонаҳои ватанӣ ва муштарак бо иштироки сармояи туркӣ, чиноӣ, покистонӣ, лаҳистонӣ, кипрӣ, белорусӣ ва русиягӣ мебошанд. Ҳаҷми умумии сармоягузории ин корхонаҳо 50 млн. доллари ИМА-ро ташкил медиҳад. Дар минтақа корхонаҳои русиягӣ маснӯъоти таҳкимбахшӣ барои сохтмон ва пойгоҳҳои обии барқӣ истеҳсол мекунанд», - зикр кард Комилова.