Мақомоти раҳбарии хоҷагии кишоварзии «Карповский»-и ноҳияи Городишевои вилояти Волгогради Русия бо дархости ба ин хоҷагӣ сафарбар намудани 250 нафар фермерони тоҷик ҷиҳати анҷом додани корҳои бахши кишоварзӣ муроҷиат намуд.

Тавре ба ОИ «Азия-Плюс» аз намояндагии Хадамоти муҳоҷирати Тоҷикистон дар Русия хабар доданд, директори хоҷагии мазкур, агрономи хизматнишондодаи Русия Владимир Чунихин зимни мулоқот бо корманди намояндагии Хадамоти муҳоҷирати ҶТ дар Русия Нусратулло Исматов изҳор кардаст, ки дар ин хоҷагӣ таҷрибаи бойи ҷалби захираҳои корӣ аз Тоҷикистон ҷой дорад.

«Ҳанӯз дар замони Иттиҳоди Шӯравӣ донишҷӯёни вилояти Суғд ҳар тобистон дар ин ҷо кор мекарданд ва аҳолии деҳоти мазкур дар бораи онҳо хотироти нек доранд», - гуфтааст ӯ зимни мулоқот.

Дар мулоқот бобати ба хоҷагии мазкур сафарбар кардани 250 нафар шаҳрвандони Тоҷикистон ҷиҳати анҷом додани корҳои кишоварзӣ мувофиқа ҳосил шуд.

Дархост аз ҷониби Хадамоти муҳоҷирати Тоҷикистон қабул ва интихоби мутахассисон сурат мегирад.