Соли гузашта дар 10 ноҳияи минтақаи Кӯлоби вилояти Хатлон 173 ҳодисаи ишғоли худсаронаи қитъаи замин ба қайд гирифта шудааст.

Тавре ба ОИ «Азия-Плюс» роҳбари Кумитаи минтақавии заминсозии Кӯлоб Тоҳир Саидов хабар дод, ҳамчунин метавон 422 ҳодисаи истифодаи замин бидуни сертификати дахлдор ба онро низ ба қатори ба ин монанд қонуншиканӣ дохил кард, зеро танҳо сертификат ҳуқуқи истифодаи онро медиҳад.

«Дар минтақаи Кӯлоб дар маҷмӯъ дар як сол 818 ҳолати риоя нагардидани қонунгузорӣ дар бораи истифодаи замин ба қайд гирифта шудааст», - гуфт ҳамсӯҳбат ва илова намуд, ки аз ин қитъаҳои замин аллакай 400 гектараш дубора барои киштукор ба хоҷагиҳои кишоварзӣ баргардонида шудааст.

Ба қавли Т.Саидов, барои ҷуброни хисороти расида қонуншиканон дар маҷмӯъ ба миқдори 216 ҳазору 410 сомонӣ ҷаримабандӣ шуданд, ки аз ин миқдор аллакай 165 ҳазору 374 сомониаш рӯёнида шудааст.

«Ба мо лозим омад, ки ҷиҳати ёрӣ расонидан 57 маротиба ба мақомоти судӣ ва 50 маротибаи дигар ба мақомоти додситонӣ муроҷиат намоем, то ки замини ғайриқонунӣ ишғолшударо озод намуда, ҷаримаҳоро рӯёнем», - таъкид кард номбурда.