Бо супориши раиси шаҳри Душанбе Маҳмадсаид Убайдуллоев, шурӯъ аз 1-уми феврали соли ҷорӣ дар пойтахти Тоҷикистон лоиҳаи сармоягузорӣ таҳти унвони «Мо метавонем» ҷорӣ мегардад.

Тавре ба ОИ «Азия-Плюс» сухангӯйи раиси пойтахт Шавкат Саидов хабар дод, лоиҳа бо мақсади беҳбуди кор оид ба муроҷиати шаҳрвандон дар асоси технологияҳои муосири иттилоотиву коммуникатсионӣ ба роҳ монда хоҳад шуд.

«Дар лоиҳа роҳандозии сабт ва назорати электронӣ дар мавриди саривақт бартараф сохтани садамаҳо дар хатти интиқоли барқ, лӯлаҳои газӣ, қубурҳои обгузар, расонидани хизматгузориҳои коммуналӣ пешбинӣ шуда, дар реҷаи он-лайн ҷиҳати беҳбуди вазъи санитарии шаҳр, беҳбуди сатҳи хизматрасонӣ дар нақлиёт ва дигар зерсохторҳои хизматрасонии шаҳри Душанбе саривақт чораҳо андешида хоҳанд шуд», - гуфт вай.

Ба қавли Ш.Саидов, мақомоти шаҳрдории пойтахт боварӣ дорад, ки бо ҷорӣ кардани лоиҳаи мазкур камбуду норасоиҳо дар хизматрасонии коммуналии шаҳри Душанбе бартараф хоҳанд шуд.