Рӯзҳои 10-15 - уми январи соли равон олимпиадаи вилоятии хонандагон аз фанҳои таълимӣ дар мактаб-интернати ёрирасони шаҳри Хуҷанд баргузор гардид, ки дар он аз 15 шаҳру ноҳияҳои вилояти Суғд хонандагони синфҳои 10-11 иштирок намуданд.

Тавре аз хадамоти матбуоти раиси вилояти Суғд хабар доданд, дар олимпиадаи вилоятӣ 696 нафар толибилмони лаёқатманд ширкат варзида, хонандагони синфи 11 аз рӯи 18 фанҳои таълимӣ донишу маҳорати худро санҷиданд.

Дар натиҷа 50 нафар ба ҷойи якум,  38 нафар ба ҷойи дуюм, 37 нафар ба ҷойи сеюм сазовор гардида, ба давраи ҷумҳуриявии олимпиада роҳхат гирифтаанд. Ҳамчунин 69 нафар хонандагони синфҳои 10-11 барои иштироки фаъолона соҳиби ифтихорнома гардиданд.

Бояд гуфт, ки дар олимпиадаи имсола хонандагони муассисаҳои таълимии шаҳру ноҳияҳои Исфара, Хуҷанд, Б.Ғафуров, Истаравшан, Конибодом, Ҷ.Расулов ва мактаби президентии шаҳри Чкалов бештар ба гирифтани ҷойҳои ифтихорӣ мушарраф гаштанд.