Шуруъ аз 1-уми апрел минтақаҳои ҷумҳурӣ мунтазам бо барқ таъмин карда мешаванд. Аммо дар ширкати «Барқи тоҷик» изҳор карданд, ки дар бораи бекор шудани лимити истифодаи барқ ҳанӯз ҳарф задан барвақт аст.

Ба қавли намояндаи ШСХК «Барқи тоҷик», интиқоли мунтазами барқ ба минтақаҳо бинобар сабаби зиёд шудани маҷрои об дар обанбори Норак, ки айни замон ҳудуди 500 метри мукааб дар як сонияро ташкил медиҳад, муяссар шудааст.

Номбурда ҳамчунин гуфт, дар робита ба сардшавии обуҳаво дар болооби дарёи Вахш дар даҳаи аввали моҳи апрел боз ҷорӣ гардидани маҳдудиятҳои кӯтоҳмуддат ба истифодаи барқ аз эҳтимол дур нест.

Лимити истифодаи барқ дар Тоҷикистон тирамоҳи соли гузашта ҷорӣ гардида буд. Лимит ба пойтахт ва шаҳрҳои бузурги кишвар дахл надошт.

То оғози фасли баҳор ба минтақаҳои кишвар дар як шабонарӯз аз 6 то 10 соат барқ дода мешуд, аммо аввали моҳи март бо сабаби сардиҳо лимит шадидтар гардида, аксари манотиқи кишвар дар як шабонарӯз танҳо бо ду соат нерӯи барқ таъмин карда мешуданд.