Рӯзи 11-уми май дар шаҳри Душанбе таҳти унвони «Мушкилоти ҳуқуқии муҳоҷират дар Тоҷикистон: назария ва амали он» мизи гирд доир мегардад.

Тавре ба ОИ «Азия-Плюс» аз Маркази миллии қонунгузории ҶТ хабар доданд, дар кори мизи гирд олимони соҳаи ҳуқуқшиносӣ, намояндагони вазорату идораҳои дахлдор ва коршиносони мустақил ширкат меварзанд.

«Дар мизи гирд масоили ҷанбаҳои ҳуқуқии муҳоҷирати корӣ, нақши созмонҳои байнулмилалӣ дар ҳалли мушкилоти муҳоҷират ва ҳалли мушкилоти гендерии муҳоҷирони корӣ мавриди баррасӣ қарор мегиранд», - зикр кард манбаъ.

Ба иттилои манбаъ, аз рӯйи натиҷаҳои кори мизи гирд қабули як қатор тавсияҳо ба вазорату идораҳои дахлдор, созмонҳои байнулмилалӣ ва ғайридавлатӣ дар назар аст.