Мақомоти шаҳрдории Кӯлоб оид ба баргузории озмун дар мавриди тозагии кӯчаву маҳалла, хиёбону боғҳои истироҳат ва қаламрави мансуб ба муассисаҳо озмун эълон кард.

Тавре ба ОИ «Азия-Плюс» муовини раиси шаҳри Кӯлоб Зулайхо Комилова хабар дод, комиссияи махсус аз ҷараёни озмун тибқи як қатор нишондиҳандаҳо – аз тозагии кӯчаву хиёбон ва мавзеҳои атрофи биноҳои истиқоматӣ то муносибати бошандагони он ба ҳамсоягон аз қишри камбизоати аҳолӣ ва маъюбону собиқадорон натиҷагирӣ хоҳад кард.

Ба гуфтаи ӯ, ба ғолибони озмун дар маҷмӯъ ба маблағи ҳудуди 36 ҳазор сомонӣ ҷоизаву мукофотҳо пешбинӣ шудаанд. «Ҳадафи аслии ин чорабинӣ ҷалби ҳарчи бештари сокинони шаҳру навоҳӣ ба тозаву озода нигоҳ доштани макони истиқомат ва саҳм гузоштан дар ободонии кишвар аст», - иброз дошт З.Комилова ва афзуд, ки натиҷаҳои озмун дар чорабиниҳои ҷашнӣ ба ифтихори 20-умин солгарди иҷлосияи тақдирсози XVI-уми Шӯрои Олии Тоҷикистон ҷамъбаст мешаванд.