Ҷопон дар таъмиру барқарор кардани як мактаб дар минтақаи шарқи ҷумҳурӣ кӯмак кард.

Тавре ба ОИ «Азия-Плюс» аз сафоратхони Ҷопон дар Тоҷикистон хабар доданд, дар маросими ифттоҳи мактаби №11 дар деҳаи Шаймаки ноҳияи Мурғоб сафири Ҷопон дар Тоҷикистон Хироюки Имахаши, муовини аввали раиси ВМКБ Исрор Исроров, раиси ноҳияи Мурғоб Мурзабай Ҷошбаев ва ҳамоҳангсози ACTED дар Мурғоб Суюнбек Тоҷиддинов иштирок карданд.

Лоиҳаи таъмиру барқарорсозии мактаб ба маблағи умумии 85 ҳазор доллари  ИМА аз ҷониби ҳукумати Ҷопон дар доираи кӯмаки бебозгашти лоиҳаи амнияти башарӣ барои қишри аъзами аҳолӣ сармоягузорӣ шуд.

«Деҳаи Шаймак бо 730 нафар аҳолӣ дар минтақаи кӯҳистон, наздикии марзи Тоҷикистону Чин ва Тоҷикистону Афғонистон воқеъ буда, дар мактаби маҳаллӣ ҳудуди 120 нафар толибилмон таҳсил мекунанд. Нисфе аз толибилмон дар хобгоҳи назди мактаб шабро рӯз менамуданд, зеро падару модарони онҳо шабонарӯзӣ дар чарогоҳҳо буданд. Соли 2006 офати табиӣ ба бинои асосии мактаб осеби зиёд расонида, идомаи таҳсил дар бинои мактабро ғайриимкон кард. Акнун хобгоҳ ба сифати синфхонаҳо истифода мегардид», - гуфтанд дар сафорат.

Бинои нави мактаб бо шумули ду ҳуҷраҳои маъмурӣ ва шаш синф, ки аз ҷониби ACTED бо дастгирии гранти Ҷопон сохта шуданд, майдони 383 метри мураббаъро дарбар мегирад. «Дар бинои мактаби нав барои таҳсил тамоми шароитҳо фароҳам буда, акнун бинои хобгоҳ аз рӯйи таъинот истифода мешавад», - афзуд манбаъ.

Кӯмакҳои бебозгашти лоиҳаҳои амнияти башарӣ барои бахши аъзами аҳолӣ ба ҳокимиятҳои маҳаллӣ, созмонҳои ғайридавлатӣ, соҳаҳои маориф ва тандурустии мамлакатҳои рӯ ба тараққӣ расонида мешавад. Лоиҳаҳои амнияти башарӣ дар бахши аъзами аҳолӣ 282 лоиҳаро ба маблағи умумии $21.1 миллион доллари ИМА дар Тоҷикистон амалӣ намудааст.