Зойирини Хонаи Худо аз ноҳияи Мӯъминобод ба суратҳисоби махсуси бартараф намудани оқибати офатҳои табиӣ дар даҳҳо маҳаллаҳои аҳолинишин ба сурати умум 8 ҳазор сомонӣ маблағ ворид карданд.

Тавре ба islamnews.tj раиси ноҳияи Мӯъминобод Пирмад Зарифов хабар дод, як гурӯҳи ҳоҷиёни оянда ба ҳукумати ноҳия муроҷиат карда, изҳор доштаанд, ки сафари худ ба макони муқаддаси Исломро аз кори хайрия, яъне кӯмак ба ниёзмандон оғоз карданианд.

«Бартараф кардани оқибати офатҳои табиӣ аз масъалаҳои муҳимтарину рӯзмарра дар дар ноҳия ба шумор рафта, камбуди маводи сӯзишворӣ ба пешравии корҳо дар ин самт, аз ҷумла таъмиру барқарор кардани роҳҳову пулҳо монеа эҷод месозад», - гуфт ӯ.

Ба қавли Зарифов, ин иқдоми ҳоҷиёни оянда ҳукуматро ба кушодани суратҳисоби махсус дар бонк водор сохтааст ва маблағҳои хайрияи он алҳол танҳо барои харидани маводи сӯзишворӣ истифода бурда мешаванд.

«Ҳукумати ноҳия низ ба ин суратҳисоб 20 ҳазор сомонӣ маблағ гузаронида, воридшавии маблағҳо аз корхонаву ташкилот, шахсони алоҳида, аз ҷумла зойирин низ идома дорад», - афзуд номбурда.