Чанде қабл низоми обтаъминкунии деҳаи Кадучии ноҳияи Восеи вилояти Хатлон, ки пурра фарогири 12 ҳазор нафар аҳолӣ аст, ба истифода дода шуд.

Тавре ба ОИ «Азия-Плюс» раиси ноҳияи Восеъ Султон Валиев хабар дод, яке аз маҳаллаҳои аҳолинишини бузургтарини ноҳия тӯли солҳои зиёд аз таъминот бо оби нӯшокӣ танқисӣ мекашид ва буҷети ночизи ноҳия имкон намедод, ки ин камбудӣ бартараф гардад.

Ба гуфтаи С.Валиев, ба туфайли дастгирии соҳибкорони маҳаллӣ – Файзалӣ Абдураҳмонов, Давлат Шарбатов ва Шералӣ Табаров 2 чоҳи чуқуриаш то 150 метр кофта шуда, зарфҳои ғунҷоишаш то 50 тонна гузошта шуданд.

«Ба тамоми кӯчаҳои деҳа қубурҳо гузаронида шуда, натанҳо аҳолӣ, балки 3 мактаб, интернат, беморхона ва 3 масҷид низ бо оби нӯшокӣ таъмин гардиданд», - афзуд раиси ноҳия.

Дар ҳамин ҳол, чанде қабл бо дастгирии молиявии Бунёди Оғохон беш аз 3 ҳазор нафар аҳолии деҳаҳои Ҷонбахт ва Дараи Мухтори ноҳияи Ховалинг низ бо оби нӯшокӣ таъмин карда шуданд.