Дар шаҳраки Дӯстии ҷамоати Патари ноҳияи Конибодом, ки бо Ӯзбекистон ҳаммарз аст, аз ҳисоби буҷети шаҳр сохтмони як бунгоҳи нави тиббӣ ба итмом расонида шуд.

Тавре ба ОИ «Азия-Плюс» аз маркази матбуоти мақомоти шаҳрдорӣ хабар доданд, муассисаи нави тиббӣ дар бинои дуошёнаи собиқ Ассотсиатсияи хоҷагиҳои деҳқонии «Патар» воқеъ буда, таъмиру азнавсозӣ шудааст ва дорои 35 кат мебошад.

Муассисаи тиббӣ аз шуъбаҳои табобати кӯдакону калонсолон, таваллудхона ва кабинетҳои физиотерапевтиву озмоишгоҳ иборат аст, ки бо таҷҳизоти муассири зарурӣ таъминанд.

Раёсати тандурустии вилоят ин муассисаро бо дастгоҳҳои ЭКГ, дефибриллятор, 2 адад катҳои махсус барои таваллуд ва дастгоҳу таҷҳизот барои озмоишгоҳ таъмин намуд.

Бо мавриди истифода қарор гирифтани муассисаи тибби мазкур аксари мушкилоти марбут ба солимии аҳолии ҷамоат ҳал шуда, акнун сокинони маҳалро зарур намеояд, ки барои табобат ба беморхонаҳои шаҳриву вилоятӣ роҳ пеш гиранд.