Ҳизби наҳзати исломии Тоҷикистон дар минтақаи ҷануби ҷумҳурӣ як мактаб барои 300 нафар толибилмон бунёд кард.

Бинои мактаб дар деҳаи Шӯроободи ҷамоати Телмани ноҳияи Қумсангири вилояти Хатлон дар фурсати кӯтоҳ – 7 моҳ қомат афрохт.

Тавре ба ОИ «Азия-Плюс» як манбаъ аз ҲНИТ хабар дод, дар бунёди мактаб ба ҳизб сокинони маҳаллӣ ва муҳоҷирони корӣ дар Русия аз ҳисоби зодагони ноҳияи Қумсангир дасти ёрӣ дароз намудаанд.

«Мутаасифона, давоми бист сол дар ин минтақа мактаби дигаре вуҷуд надошт ва кӯдакону наврасон бесавод монда буданд, ба истиснои чанд нафаре, ки дар масофаи панҷкилометрии деҳаи ҳамсоя бо мушкилоти зиёд пиёдаву савора барои таҳсил саргардон буданд», - гуфт манбаъ.

Вазорати маорифи ҷумҳурӣ мактаби навро бо мебел, мизу курсиҳо ва тахтаҳои синфӣ таъмин намуда, чор компютер тақдим кард.