Дар арафаи оғози баррасии шикояти кассатсионии парванда дар бораи қатъи фаъолияти Ассотсиатсияи ҳуқуқшиносони ҷавони «Ампаро» як қатор созмонҳои ғайридавлатӣ аз ҳукуматдорони Тоҷикистон даъват ба амал оварданд, ки даъвои судӣ нисбат ба ташкилотро бозпас гирифта, ба фаъолияти он дар самти дифоъ аз ҳуқуқ монеъа эҷод насозанд.

Cанади мазкур аз ҷониби созмонҳои ҷамъиятии 15 кишвари Аврупо ва минтақаи Осиёи Марказӣ ба имзо расидааст.

Дар санад таъкид мегардад, ки чунин амалҳои ҳукуматдорони Тоҷикистон нақзи ӯҳдадориҳои қабулшудаи давлат дар доираи СММ ва САҲА мебошад, ки ба озодии фаъолияти иттиҳодияҳо кафолат медиҳанд. «Созмонҳои ҳомии ҳуқуқ аз ҳимояти махсус бархӯрдор буда, набояд аз ҷониби кишварҳои сохти демокративу ҳуқуқӣ мавриди таъқиб қарор гиранд», - гуфта мешавад дар ҳуҷҷат.

Ёдрас мекунем, ки чанде қабл суд даъвои Раёсати адлияи вилояти Суғдро қонеъ намуда, фаъолияти минбаъдаи Ассотсиатсияи ҳуқуқшиносони ҷавони «Ампаро»-ро манъ кард. Намояндагони «Ампаро» ин қарорро ғайриқонунӣ ва бепоя хонда, изҳор доштанд, ки фаъолияти худро қатъ карданӣ нестанд.