Мақомоти шаҳрдории Душанбе таҳти унвони «Волидайни беҳтарини сол» озмун эълон кард.

Бино ба маълумоти мақомоти шаҳрдории пойтахт, озмун ба хотири таҳкими робитаи падару модарон бо муассисаҳои таълимӣ, ҳавасманд гардонидани  волидайни беҳтарин барои дар сатҳи баланд ба роҳ мондани таълиму тарбияи фарзандон ва ҷалби онҳо ба раванди таълиму тарбияи насли наврас гузаронида мешавад.

«Дар Озмун волидайни хонандагони муассисаҳои таълимии шаҳри Душанбе, ки на камтар аз се нафар фарзандонашон дар муассисаҳои таълимӣ таҳсил мекунанд,  ҳуқуқи иштирок  доранд. Озмун дар се марҳила доир гардида, давраи аввал моҳи феврали соли оянда дар сатҳи муассисаҳои таълимӣ давраи дуюм моҳи март дар сатҳи ноҳияҳо ва давраи сеюм моҳи апрел дар сатҳи умумишаҳрӣ баргузор мешавад», - гуфт манбаъ.

Зимнан зикр гардид, ки дар таҷлили ҷашни Рӯзи пойтахт ғолиби озмун бо мукофоти пулӣ дар ҳаҷми 5 ҳазор сомонӣ сарфароз гардонида мешавад.