Рӯзҳои 11-12-уми декабр дар кори мизи гирд дар ноҳияи Рашт масоили таъмини амнияти ғизоӣ дар манотиқи кӯҳистони Тоҷикистон баррасӣ шуданд.

Чорабиниии мазкур аз ҷониби Академияи улуми кишоварзӣ бо мусоидати ташкилоти ғизо ва кишоварзии СММ дар доираи амалисозии лоиҳаи «Дастгирӣ дар таҳкими низоми миллии иттилоотии амнияти ғизоӣ дар Тоҷикистон», ки аз тарафи Иттиҳоди Аврупо маблағгузорӣ мешавад, созмон дода шуд.

Тавре аз намояндагии созмони мазкур хабар доданд, ҳадаф аз вохӯрӣ баррасии масоили асосии таъмини амнияти ғизоӣ дар манотиқи кӯҳистони ҷумҳурӣ ва ошкор намудани роҳҳои ҳалли онҳо буд.

Раиси ноҳияи Рашт Саидмурод Абдураҳмонов зимни суханронӣ бевосита дар бораи мушкилоти рӯзмарраи минтақаи кӯҳистон, аз ҷумла истифодаи заминҳои лалмӣ, коҳиши истеҳсорли маҳсулоти кишоварзӣ, талафоти маҳсулот бинобар сабаби мавҷуд набудани корхонаи коркард ва бозори фурӯш ва ҳамчунин масоили бозорёбии  занбӯрисалапарварӣ ҳарф зад.

Менеҷери лоиҳаи «Дастгирӣ дар таҳкими низоми миллии иттилоотии амнияти ғизоӣ дар Тоҷикистон» Сангинбой Сангинов изҳор кард, ки ҳудуди 45%-и аҳолии кишвар дар шароити кӯҳистон зиндагӣ дошта, бинобар сабаби болоравии нархи маҳсулоти ғизоӣ, сатҳи осебпазирии онҳо меафзояд.

Мудири кафедраи назарияи иқтисоди Донишгоҳи кишоварзӣ Ихтиёр Ашӯров зикр намуд, ки сарфи назар аз камбуди тухмии хушсифат, нуриҳои минепралӣ ва воситаҳои ҳифзи кимиёвии рустаниҳо, тибқи маълумоти оморӣ кишвоарзони манотиқи кӯҳистон дар истеҳсоли маҳсулоти кишоварзӣ ба комёбиҳои назаррас ноил гардида, дар онҷо масъалаи таъмини амнияти ғизоӣ ҳал шудааст.

«Аммо вазъи воқеӣ ба омор мувофиқат надошта, масъалаи таъмин бо маводи ғизоӣ ва дастрасии он дар манотиқи кӯҳистон мушкил боқӣ мемонад», - гуфт ӯ.