Таътили зимистонаи толибилмони макотиби таҳсилоти умумии Тоҷикистон як моҳ давом мекунад.

Тавре аз Вазорати маорифи ҷумҳурӣ иттилоъ доданд, таътил 1-уми январ оғоз гардида, 31-уми январ таҳсил оғоз меёбад. «Матни қарор дар ин бораи омода гардида, вале ҳанӯз аз ҷониби вазири маориф Нуриддин Саидов ба имзо нарасидааст», - гуфтанд дар вазорат.

Ба иттилои манбаъ, ҳоло ба таътили баҳорӣ баромадани толибилмони макотиб маълум нест, зеро соли оянда таҷлили Иди Наврӯз дар Тоҷикистон муддати 5 рӯз идома меёбад. «Сарфи назар аз таъин шудан ё нашудани таътили баҳорӣ, толилмон дар иди Наврӯз истироҳат хоҳанд кард», - гуфт манбаъ.

Зимнан зикр гардид, ки иди Занги камолот чун анъана 25-уми май ҷашн гирифта хоҳад шуд.

Ёдрас мекунем, ки соли равон Вазорати маорифи ҷумҳурӣ бо назардошти супориши мақомоти шаҳрдории Душанбе ва сард омадани зимистони имсола таътили тирамоҳии толибилмони макотиби таҳсилоти умумиро бекор кард.