Чанде қабл дар мақомоти шаҳрдории Душанбе ситоди шаҳрии хадамоти коммуналӣ таъсис дода шуда, онро шахсан раиси пойтахт Маҳмадсаид Убайдуллоев роҳбарӣ мекунад.

Тавре ба ОИ «Азия-Плюс» котиби матбуотии раиси шаҳри Душанбе Шавкат Саидов хабар дод, раиси пойтахт супориш додааст, ки барои бартараф намудани оқибатҳои барфрезиҳои шадид, сардиҳо ва дигар ҳолатҳои фавқулода, дар мақомоти шаҳрдорӣ, ноҳияҳо ва хадамоти коммуналӣ навбатдории шабонарӯзии роҳбарони хадамоти дахлдор роҳандозӣ карда шавад.

Ба гуфтаи ӯ, айни замон тамоми техникаи барфтозакун дар ҳолати омодагӣ қарор дошта, аз субҳи имрӯз тамоми роҳҳои пойтахт бо хок ва намак коркард мешаванд.