Бар асоси хулосаи Раёсати ҳифзи муҳити зисти пойтахт ва комиссияи ҷамъиятӣ, дар ҷараёни азнавсозии як қисмати кӯчаи Айнии шаҳри Душанбе дарахтоне, ки ба корҳои таъмиру барқарорсозӣ монеъа эҷод месозанд, бартараф карда мешаванд.

Тавре аз мақомоти шаҳрдории пойтахт хабар доданд, дар робита ба ин раиси шаҳр Маҳмадсаид Убайдуллоев қароре ба тасвиб расонид, ки мутобиқи он, дарахтони буридашуда барои истифода ба раёсатҳои тандурустии шаҳр (дар ҳаҷми 150 метри мукааб) ва мақомоти маҳаллии ҳокимияти давлатии ноҳияи Шоҳмансур (дар ҳаҷми 150 метри мукааб) дода мешаванд. «Дар қарор риояи меъёрҳои экологӣ зимни иҷрои корҳо таъкид шудааст», - гуфт манбаъ.

Ёдрас мекунем, ки аз аввали моҳи декабр то 30-юми августи соли 2013 ҳаракати воситаҳои нақлиёт дар роҳи аз майдони ба номи Айнӣ то майдони Ғалаба манъ карда шуд. Пас аз таҷдид роҳ васеъ карда мешавад.