Намояндагии Хадамоти муҳоҷирати назди ҳукумати Тоҷикистон дар Русия барои ҳарчи зудтар ба ватан фиристодани муҳоҷире, ки ба ҳолати мушкил афтодааст, чораҳо меандешад.

Бино ба маълумоти Маркази робита бо ҷомеаи Хадамоти муҳоҷират, дар беморхонаи шаҳри Волжски вилояти Волгогради Русия марди 45-50 солае бистарӣ аст, ки шояд бемори сактаи қалб ё майнаи сараш зарб хӯрдааст, зеро қисман фалаҷ буда, бо душворӣ ҳарф мезанад.

«Мувофиқи суханонаш, ӯ зодаи Исфара ё Хуҷанд буда, вале суроғаи мушаххасеро гуфта наметавонад ва бо худ ҳуҷҷат ҳам надорад. Аснои суҳбат бо намояндаи Хадамоти муҳоҷират маълум шуд, ки ӯ дар корхонаи соҳибкори инфиродӣ дар бахши кишоварзӣ фаъолият доштааст», - зикр мегардад дар иттилои ХМ.

Ба қавли роҳбари шуъбаи нейрохирургии беморхонаи мазкур Станислав Журбенко, алҳол вазъи саломатии бемор беҳтар буда, ба ватан фиристодани ӯ имконпазир аст.

Зимнан зикр мегардад, ки айни замон аз ҷониби кормандони намояндагии Хадамоти муҳоҷирати Тоҷикистон ҷиҳати муайян намудани шахсият ва ба ватан фиристодани ӯ чораҳо андешида мешаванд.