Фурудгоҳи байнулмилалии Душанбе пас аз таваққуфи чандсоата барои парвозҳо иҷозат дод.

Тавре сухангӯи Фурудгоҳи байнулмилалии Душанбе Муҳаммадюсуф Шодиев хабар дод, шурӯъ аз соати 11:30-и имрӯз ба хатсайрҳое, ки бинобар сабаби боридани барфи баланд парвозашон ба таъхир уфтода буд, ба парвозҳо омодагӣ гирифта шуда, дар хатсайри Душанбе–Москва бақайдгирии мусофирон анҷом ёфт.

«Баландии барфи борида дар хати нишасту парвоз 4 см ро ташкил кард. Хадамоти марбута пас аз каме паст шудани шиддати барфборӣ ба кор шурӯъ карданд ва дар ин соат хати нишасту парвоз, роҳравҳои зимомӣ ва тавақуфгоҳҳо аз барф тоза шуда, имкони қабул ва парвози ҳавопаймоҳо муяссар гардид», - гуфт ӯ.

Ба қавли вай, алъон ҳавопаймои хатсайри Москва–Душанбе, ки аз фурудгоҳи Внуково парвоз кард дар фурудгоҳи Самарқанд нишаста, хатсайрҳои Қазон-Душанбе, Екатеринбург-Душанбе, Москва-Душанбе дар фурудгоҳи Хуҷанд интизори парвозанд.

Ин соате, ки хабар омода мешавад, парвози ҳавопаймоҳо аз фурудгоҳи Душанбе ба ҳамаи хатсайрҳо иҷозат дода шуда, қабули ҳавопаймоҳо пас аз чанде шурӯъ хоҳад шуд.