Сатҳи камбизоатӣ дар Тоҷикистон то 38,3% коҳиш ёфт.

Вазири рушди иқтисод ва савдои ҶТ Шариф Раҳимзода зимни нишасти матбуотӣ дар ин робита изҳор намуд, ки давлат баҳри аз байн бурдани мафҳуми «қишри камбизоати аҳолӣ» ва пайдо шудани ҳарчи бештар қишри аҳолии дорои даромади миёна тадбирҳо хоҳад андешид.

«Мо бояд муайян созем, ки қишри миёна чӣ гуна аст. Дар Қазоқистон шахси дорои маълумот, манзил, автомашина, суратҳисоби депозитӣ дар бонк ва имкони сафар ба хориҷа як маротиба дар як сол барои истироҳатро ба синфи миёна шомил месозанд, вале дар Тоҷикистон то ҳанӯз ин нишондиҳанда мушаххас нест», - гуфт вай.

Бино ба маълумоти Вазорати рушди иқтисод ва савдои ҷумҳурӣ, сатҳи камбизоатӣ дар кишвар сол то сол коҳиш меёбад: соли 2008 ин нишондиҳанда – 50%, соли 2009 – 46,7%, соли 2010 – 45%, соли 2011 – 41% ва соли 2012 – 38,3%-ро ташкил медиҳад.

Ба гуфтаи вазир, дар натиҷаи амалисозии ду барномаи стратегии давлатӣ оид ба коҳиши сатҳи камбизоатӣ, дар кишвар коҳиши усутвори сатҳи камбизоатӣ ба мушоҳида мерасад.