Бо ташаббуси СММ дар Тоҷикистон таҳти унвони «Ҷаҳон пас аз соли 2015» як силсила машваратҳои миллӣ оғоз мегардад.

Чунин машваратҳо беш аз 100 кишвари саросари ҷаҳонро фаро гирифта, як назарсанҷии глобалӣ маҳсуб меёбанд, ки дар ҷараёни он СММ вохӯриву чорабиниҳои дигар доир намуда, муайян кардани самти бештар муҳим барои беҳбуди вазъ дар ҷаҳонро дархост мекунад.

Зимни нишасти матбуотӣ ҳамоҳангсози СММ ва намояндаи доимии Барномаи рушди СММ дар ҶТ Александр Зуев дар ин робита изҳор намуд, ки машваратҳои мазкур имконоти нодирест барои огоҳ шудан аз андешаи мардум, вазифаҳои афзалиятноки кишвар ва ҷомеаҳо.

«Дар машваратҳо ҷавонон, намояндагони аққалиятҳои миллӣ, кормандони давлатӣ, вакилони парлумон, нафақахӯрону соҳибкорон ва намояндагони қишрҳои гуногуни Тоҷикистон ширкат варзида, натиҷаҳои машварату назарсанҷиҳо зимни таҳияи масоили нави рушди глобалӣ ба маълумоти сарони кишварҳо расонида мешаванд», - гуфт вай.

Дар нишасти хабарии мазкур зикр гардид, ки дар чаҳорчӯби чорабинии мазкур дар тамоми манотиқи Тоҷикистон 10 машварати мавзӯӣ гузаронида мешавад. Ҳамчунин барои муайян кардани самтҳои афзалиятноки пурсамар барои рушди Тоҷикистон дар сафҳаҳои порталҳои интернетӣ низоми овоздиҳӣ боз мегардад. Назарсанҷӣ таҳти унвони «Тоҷикистоне, ки мо орзуяш дорем» баргузор мешавад.