Бо ташаббуси нашриёти «Адабиёти бачагона» ва Вазорати фарҳанги ҶТ аз 8 феврал то 30-юми апрел дар шаҳру навоҳии Тоҷикистон намоишгоҳ-фурӯши асарҳои бадеӣ барои кӯдакон баргузор мешавад.

Тавре ба ОИ «Азия-Плюс» мудири нашриёти «Адабиёти бачагона» Наҷмиддин Зайниддинов хабар дод, маросими расмии чорабинӣ рӯзи 8-уми феврал дар Кохи фарҳанги ноҳияи Рӯдакӣ доир мегардад.

«Дар намоишгоҳ 110 номгӯи адабиёти бачагона аз осори класиикону адибони муосир ва ду китоби ҳикоёти нависандагони белорусу олмонӣ дар тарҷума ба забони тоҷикӣ ба маърази тамошо ва фурӯш гузошта шуда, қимати китобҳо аз 70 дирам то 16 сомониро ташкил медиҳад», - иброз дошт вай.

Ба қавли ӯ, намоишгоҳ-фурӯши адабиёти бачагона дар ноҳияи Зафаробод ба итмом мерасад. «Дар доираи чорабинӣ вохӯриҳои шоирону нависандагон бо толибилмони макотиб баргузор шуда, асарҳои нависандагон барои кӯдакон баррасӣ мешаванд», - афзуд номбурда.