Дар Тоҷикистон то ҳанӯз дастур барои имомхатибон таҳти унвони «52 маъвизаҳои намози ҷумъа» ба чоп нарасидааст.

Кумитаи умури дини қаблан масъул ба нашри ин дастур акнун ба Маркази исломии Тоҷикистон ишора мекунад. Дар бораи нашри ин дастур раиси Кумитаи мазкур Абдураҳим Холиқов ҳанӯз аввали соли 2010 сухан гуфта буд.

Дар Кумитаи умури дин изҳор намуданд, ки дар дастур 52 мавзӯи ҳатмӣ барои маъвизаҳои намози ҷумъа – яктогӣ барои ҳар ҳафтаи сол дарҷ хоҳанд шуд ва имомхатибони масҷидҳо набояд аз мавзӯъҳои пешниҳодшуда саркашӣ кунанд.

Тавре ба IslamNews сардори Раёсати иттиҳодияҳои динии Кумитаи умури дин Солеҳҷон Завқиев хабар дод, айни замон дастури мазкур дар шуъбаи фатвои Маркази исломии Тоҷикистон мавриди таҳия қарор дорад ва худи онҳо онро ба имомхатибон тақсим хоҳанд кард. «Масъули нашри дастур Маркази исломӣ аст, зеро маҳз дар ҳамон ҷо фатвоҳо содир мешаванд ва дар сурати аз ҷониби аъзои Шӯрои уламо тасдиқ шудани дастур, он ба ташхис дар Кумитаи умури дин ниёзе нахоҳад дошт», - иброз дошт вай.

Дар Маркази исломии Тоҷикистон дар ин робита изҳор карданд, ки дар шуъбаи фатво то ҳол ба таҳияи ин дастур машғуланд, вале муҳлати анҷоми он ҳанӯз маълум нест.