«Муқаддимаи муҳоҷиратшиносӣ» аввалин китоби таълимие мебошад, аз ҷониби кормандони Академияи илмҳои Тоҷикистон ва Институти фалсафа, сиёсатшиносӣ ва ҳуқуқи ба номи А.М. Баҳоуддинов таҳия ва дар ҳаҷми 89 саҳифа ба табъ расид.

Бино ба маълумоти маркази матбуоти Хадамоти муҳоҷирати назди ҳукумати ҶТ, дар дастур ба паҳлӯҳои мусбию манфии раванди муҳоҷирати аҳолӣ, сабабҳои муҳоҷират, шаклҳои муҳоҷирати аҳолӣ, методи баҳисобгирии муҳоҷирати аҳолӣ, сиёсати давлатии Тоҷикистон дар бораи муҳоҷират, асосҳои қонунии раванди муҳоҷират ва дигар мавзӯҳои вобаста ба муҳоҷират таваҷҷуҳи хосса зоҳир шудааст.

Ба иттилои манбаъ, ин китоб на танҳо барои мутахассисони соҳаҳои илмҳои ҷамъиятӣ, балки барои кормандони давлатӣ, ки ба масъалаҳои муҳоҷират сару кор доранд, инчунин барои баланд бардоштани савияи дониши донишҷӯён, шаҳрвандоне, ки ба хориҷа барои кор сафар мекунанд, аҳамияти хос дошта, дар маҷмӯъ барои оммаи васеи хонандагон муфид хоҳад буд.