Муовини аввали раиси МН МО ҶТ Амиршо Миралиев бо муовини сардори Кумитаи байналмиллалии Салиби Сурх (КБСС) дар умури Аврупо ва Осиёи Марказӣ хонум Каролине Доуиллез Садоуба, сардори дафтари намояндагии кумитаи мазкур дар Тоҷикистон хонум Северин Шаппаз ва котиби генералии Ҳилоли Аҳмари Тоҷикистон Зафар Муҳаббатов бо хоҳиши онҳо мулоқот намуд.

Бино ба маълумоти хадамоти матбуоти палати поёнии парлумони ҷумҳурӣ, зимни мулоқот Амиршо Миралиев изҳор кард, ки Тоҷикистон имрӯз бо бисёр кишварҳои тараққикардаи дунё ва созмонҳои байналмиллалӣ ҳамкориҳои хуб дошта, Кумитаи байналмиллалии Салиби Сурх яке аз чунин созмонҳои бонуфузест, ки солҳои тулонӣ дар Тоҷикистон фаъолият менамояд.

«Мардуми мо кӯмак ва дастгириҳои ин созмонро дар солҳои аввали соҳибистиқлолиятииТоҷикистон, ки барояшон хеле душвор буд ҳеҷ гоҳ фаромӯш нахоҳад кард. Имруз ҳам КБСС дар ҳамбастагӣ бо Ҳилоли Аҳмари Тоҷикистон аз рӯи як қатор лоиҳаҳо ва барномаҳои гуногун дар Тоҷикистон корҳои назаррасеро ба сомон расонидаанд, ки ин шоёни таҳсин аст», - иброз дошт ӯ.

Амиршо Миралиев ҳамчунин таъкид кард, ки имрӯз вақти он расидааст, ки Кумита имконият дорад намояндагиҳои худро дар дигар манотиқи Тоҷикистон баҳри густариши ҳамкориҳои судманд ифтитоҳ намояд. То кунун Ҳилоли Аҳмари Тоҷикистон 65 бахшҳои шахрию ноҳиявӣ ва 4 бахшҳои вилоятиву минтақавии худро дар ҷумҳурӣ баҳри фаъолияти густурда ифтитоҳ намудааст.

Сардори Кумитаи байналмиллалии Салиби Сурх дар умури Аврупо ва Осиёи Марказӣ хонум Каролине Доуиллез Садоуба иброз дошт, ки Кумита бо ҳукумати Тоҷикистон ва дигар ниҳодҳои давлатии ин кишвар дар самтҳои гуногун, аз ҷумла безарарсозии майдонҳои минакоришуда, беҳбуди вазъи зиндониён ҳамкориҳои хубро роҳандозӣ намуда, ният дорад, ки дар ин бахшҳо робитаҳои хешро боз ҳам тақвият бахшад.

Сардори КБСС дар умури Аврупо ва Осиёи Марказӣ иброз намуд, ки «мо ният дорем, дар соли ҷорӣ дафтари намояндагии худро бо мақсади таҳким ёфтани робитаҳо дар шимолу ҷануби Тоҷикистон ифтитоҳ намоем».