Аз оғози соли равон дар минтақаи шимоли ҷумҳурӣ 55 корхонаи нави хурду миёна мавриди истифода қарор гирифта, дар онҳо беш аз 1 ҳазор ҷойҳои нави корӣ фароҳам оварда шуд.

Бино ба иттилои хадамоти матбуоти раиси вилояти Суғд, дар корхонаҳои мазкур маснӯоти қанодиву гӯштӣ, шириву ордӣ, нӯшокиҳо, равғани рустанӣ, мебели навъҳои гуногун, дару тирезаҳои пластикӣ ва ғайра истеҳсол шуда, ҳамчунин чанде аз онҳо ба коркарди зирооати ғаллдона, чарм ва дигар маҳсулоти ниёзи мардум машғуланд.

Ба иттилои манбаъ, соли равон дар қаламрави вилоят ба истифода додани 120 корхонаи нав дар назар аст, ки ба муҳайё кардани 5 ҳазор ҷойи кори иловагӣ имкон медиҳад.

Дар ҳамин ҳол, тибқи маълумоти Агентии омори назди президенти ҶТ, айни замон дар вилояти Суғд ҳамагӣ 295 корхонаи саноатӣ фаъолият доранд, ки давоми моҳҳои январ-марти соли ҷорӣ дар онҳо ба маблағи 938 млн. 575,4 ҳазор сомонӣ маҳсулот истеҳсол шудааст.