Дар шаҳри Душанбе ба ифтихори таҷлили ҷашни Рӯзи ваҳдати миллӣ бинои мактаби таҳсилоти умумӣ бо 320 ҷойи нишаст, беш аз 15 ҳазор метри мураббаъ манзили истиқоматӣ, варзишгоҳҳо бо майдони умумии ҳудуди 5 ҳазор метри мураббаъ ва зиёда аз 3 километр роҳҳои таъмиру азнавсозишуда мавриди истифода қарор гирифтанд.

Чӣ тавре ки ба ОИ «Азия-Плюс» сухангӯи мақомоти шаҳрдории Душанбе Шавкат Саидов хабар дод, барои бунёди иншооти мазкур аз буҷети шаҳр ва аз ҳисоби воситахои соҳибкорони хусусӣ беш аз 101 млн. сомонӣ маблағ хароҷот шудааст.

«Бо қарори раиси пойтахт Маҳмадсаид Убайдуллоев, маросими тӯйи хатнасури 221-нафар кӯдакон аз оилаҳои камбизоат, ки шоми 26-уми июн ба муносибати ҷашни Рӯзи ваҳдати миллӣ дар МД «Боғи пойтахт» доир гардид, анънавӣ шуда, минбаъд ҳамасола рӯзи 26-уми июн дар ҳамин боғ баргузор карда мешаванд», - таъкид кард Саидов.